Lífsgæðasetur St.Jó 3.hæð, Suðurgata 41

Alzheimersamtökin starfa um land allt og vinna að hagsmunamálum fólks með heilabilunarsjúkdóma með stuðningi, ráðgjöf og fræðslu. Heilabilunarsjúkdómar eru ekki hluti af eðlilegri öldrun. Alzheimerssjúkdómur er  taugahrörnunarsjúkdómur og algengasta orsök heilabilunar. Alois Alzheimer var þýskur læknir sem árið 1906 lýsti einkennum sjúkdómsins fyrstur manna og sýndi hann jafnframt fram á mjög einkennandi breytingar í heila sjúklingsins. Sjúkdómurinn er algengastur hjá eldra fólki, en yngri einstaklingar geta líka veikst. 

Árið 1997 gaf Pétur Símonarson Alzheimersamtökunum (þá FAAS) húsið að Austurbrún 31 til minningar um konu sína Fríðu Ólafsdóttur. Endurbætur og undirbúningur tók um þrjú ár. Sérhæfð dagþjálfun fyrir fólk með heilabilun tók til starfa í byrjun janúar 2001. Fríðuhús er dagþjálfun rekin af Alzheimersamtökunum.

Markmið dagþjálfana í rekstri Alzheimersamtakanna er að:

viðhalda sjálfstæði einstaklingsins eins lengi og kostur er með því að styrkja líkamlega og vistmunalega hæfni hans og  stuðla þannig að því að hann geti búið sem lengst heima.

rjúfa félagslega einangrun og efla þátttöku í daglegum athöfnum.

efla sjálfstraust, draga úr vanlíðan og vanmáttakennd.

Tekið er mið af getu hvers og eins þannig að einstaklingurinn fái að njóta sín og finni fyrir öryggi og vellíðan.  Fastir liðir í þjálfuninni eru m.a. samverustundir, upplestur, söngur, leikfimi, útivera, gönguferðir, aðstoð í eldhúsi, hannyrðir, kertagerð, heimsókn frá presti, barnakór, Vinabandið kemur einu sinni í mánuði og spilar fyrir dansi, farið í dagsferðir, farið á söfn og sýningar.

Alls dvelja í húsinu dag hvern 18 einstaklingar með heilabilun.

Fríðuhús

Við erum hér til að hjálpa