List & líðan

Hvernig geta skapandi vinnubrögð og myndlist stuðlað að félagslegri þátttöku og bætt líðan einstaklinga með heilabilun?

Í þessum fyrirlestri fjallar Unnur Mjöll, verkefnastjóri fræðslu og miðlunar hjá Hafnarborg, um hvernig einföld og skapandi verkefni geta verið hluti af daglegu lífi fólks, í þeim tilgangi að auka lífsgæði og vellíðan. Þá segir hún frá þróunarverkefni sem hún hefur verið að vinna að, með nálgun listmeðferðar, þar sem rýnt er í það hvort myndlist geti nýst sem tæki til að styðja við einstaklinga á krefjandi tímabilum lífsins. Þar leggur hún sérstaka áherslu á samtöl og sköpun.

Í fyrirlestrinum kemur hún með ýmsar hugmyndir sem geta nýst fólki til að eiga gæðastundir með einstaklingum með heilabilun.

Unnur Mjöll S. Leifsdóttir er verkefnastjóri fræðslu og miðlunar hjá Hafnarborg, menningar- og listamiðstöð Hafnarfjarðar. Hún er myndlistarkona, safnfræðslukennari og meistaranemi í listmeðferðarfræði við OsloMet háskólann í Osló. Hún lauk BA-gráðu í myndlist frá Listaháskóla Íslands (LHÍ) og MA-gráðu frá School of Visual Arts í New York, auk kennsluréttinda.

Í starfi sínu hjá Hafnarborg vinnur Unnur Mjöll að þróun fræðslu- og miðlunarverkefna með það að markmiði að gera listina aðgengilega og merkingarbæra fyrir fjölbreyttan hóp gesta. Hún hefur meðal annars leitt safnfræðslu, listasmiðjur og samtöl milli listafólks og almennings.