Dagskrá júlí og ágúst 2024

Við hjá Alzheimersamtökunum þökkum kærlega fyrir góða þátttöku í bekkjagöngunni og heimsókn til okkar í Lífsgæðasetur St. Jó. í Hafnarfirði, þann 8. júní síðastliðinn.

Vonir standa til að bekkjagangan sé komin til að vera og að þetta verði árlegur viðburður héðan í frá. Fjólubláu bekkjunum fjölgar jafnt og þétt í hinum ýmsu bæjarfélögum og vonandi verður þessi vel heppnaða ganga til þess að göngurnar verði haldnar víðar en í Hafnarfirði á komandi ári.

Með viðburði eins og bekkjagöngunni og notkun fjólubláa litsins vilja Alzheimersamtökin vekja athygli á og auka umræðu um heilabilun í samfélaginu. Auk þess að vekja athygli á starfi samtakanna sem hagsmunasamtök og þeirri þjónustu sem samtökin veita einstaklingum með heilabilun og aðstandenda þeirra.

Vitundarvakningar er þörf og er það í þágu allra, að þekking og skilningur aukist í garð þeirra sem greinast með heilabilun og þeirra sem standa þeim næst. Með aukinni þekkingu og skilningi verður auðveldara fyrir einstaklinga með heilabilun að viðhalda virkni og minnka hættu á að draga sig í hlé og einangrast. En einangrun er oft á tíðum fylgifiskur þess að upplifa þann vanmátt sem stafar af breyttri getu til ýmissa verka og/eða samskipta. Það verður líka seint of oft sagt að það að viðhalda virkni af einhverju tagi er öllum gríðarlega mikilvægt. Ekki síst því fólki sem glímir við heilabilun af einhverju tagi, því víst er að það að viðhalda virkni getur hægt á framþróun slíks sjúkdóms og minnkað einkenni.