Lífsgæðasetur St.Jó 3.hæð, Suðurgata 41

Alzheimersamtökin starfa um land allt og vinna að hagsmunamálum fólks með heilabilunarsjúkdóma með stuðningi, ráðgjöf og fræðslu. Heilabilunarsjúkdómar eru ekki hluti af eðlilegri öldrun. Alzheimerssjúkdómur er  taugahrörnunarsjúkdómur og algengasta orsök heilabilunar. Alois Alzheimer var þýskur læknir sem árið 1906 lýsti einkennum sjúkdómsins fyrstur manna og sýndi hann jafnframt fram á mjög einkennandi breytingar í heila sjúklingsins. Sjúkdómurinn er algengastur hjá eldra fólki, en yngri einstaklingar geta líka veikst. 

Maríuhús tók til starfa 1. október 2008. Rekstraraðili er Alzheimersamtökin í samvinnu við Reykjavíkurborg sem leggur til húsnæði.  Það er opið alla virka daga frá 8:00 – 16:00. Maríuhús er ætlað fyrir einstaklinga með heilabilun og er með leyfi fyrir 22 skjólstæðinga á dag.  Öllu jafna eru 27 til 30 skjólstæðingar sem nýta sér þau pláss en fólk kemur 3 til 5 daga í viku eftir því hvað hentar viðkomandi. 

Daggjöld eru greidd af Sjúkratryggingum en samkvæmt reglugerð greiða skjólstæðingar einnig daggjald. Einnig er greitt mánaðarlega í afþreyingarsjóð sem er nýttur í að fara í rútuferðir út úr bænum, á kaffihús, söfn, bíó, tónleika eða annað slíkt.  Akstur til og frá heimili er innifalinn. 

Markmið okkar er hjálpa skjólstæðingum að viðhalda sjálfstæði eins lengi og kostur er.  Að styrkja og þjálfa vitsmunalega og líkamlega færni og stuðla þannig að lengri búsetu heima.  Við viljum efla sjálfstraust, draga úr vanmáttarkennd og vanlíðan.  Við viljum rjúfa félagslega einangrun og efla þátttöku í athöfnum daglegs lífs. Við fylgjumst með daglegu heilsufari og grípum inn í ef þörf krefur.  Við viljum líka létta undir með aðstandendum. 

Maríuhús

Við erum hér til að hjálpa